عد طرح البرومو الرسمي لفيلم ابن مين فيهم، كشف أبطال العمل، وعلى رأسهم بيومي فؤاد وليلى علوي لـ ET بالعربي، تفاصيل جديدة حول الفيلم وشخصياته، مؤكدين اختلافه عن الأعمال التقليدية.
وقال بيومي فؤاد: “أنا مش قلقان طبعًا من التكرار، لأن في دويتوهات نجحت في السينما المصرية من أيام الزمن الجميل، والجديد كمان إن إحنا مش بنعمل قصة شبه بعضها، حتى لو كان جزء تاني من حدوتة، بيبقى فكرة مختلفة خالص، حتى لو بنفس الكاست أو شركة الإنتاج أو المخرج”.
وأضاف: “قعدت أتخيل شكل شخصية رشدي هيبقى عامل إزاي، واقترحت على المخرج نغير شكله، مش لازم يبقى شكله حلو عشان يوقع الستات وخلاص، ويبقى مختلف عن أعمالي السابقة، وكمان إزاي هيكون مقنع إنه يوقع الستات وهو في السن ده، الحقيقة أنا شايف رشدي مش رجل أعمال، ده راجل ورث فلوس وضيعها على جوازاته، ولما الفلوس خلصت فلس، لحد ما حصلت المفاجآت اللي في الأحداث”.
من جانبها، قالت ليلى علوي: “المختلف في شخصيتي إنها مهتمة بقضايا المرأة، وممكن تتطوع في شغلها كمحامية عشان تجيب حق الزوجة أو الأولاد، لأنها حاسة بده جدًا كأم وامرأة، التحدي مش في الشخصية لأنها واقعية ولذيذة، على قد ما هي محامية حاسمة، لكنها كمان خفيفة الدم وملتزمة جدًا”.
وتابعت: “أنا شايفة التحدي الحقيقي في المفاجآت اللي هيشوفها الجمهور، واللي مش متوقعها خلال الأحداث”.